Ceceの華麗麗烘焙。生活記事

暴龍駕到！！！（咆哮）

細細個就好鍾意恐龍，恐龍圖鑑、與龍同行、National Geographic紀錄片，只要係恐龍主題都不會放過！不過香港無恐龍，無機會睇恐龍化石，最近香港科學館會舉辦「巨龍傳奇」展覽，當然第一時間拉老公陪我朝聖。

星期六訓飽飽，食個Tea，下午4點先到逹，門外有近200人"打蛇餅"排隊買飛！好在有博物館全年通行証旁身，直接入場暢通無阻！

（小貼士：憑博物館全年通行証可以直接入場，不想排長龍的朋友，特別係2-4人家庭，雖烈建議行過對面的歷史博物館申請全年通行証，4人家庭全年無限次出入香港所有博物館只係100個大洋，抵啦！）

展覽廳位於科學館地底，一進場就有精美場刊，內有Q版地圖說明各展品位置，設計好可愛！入場券亦印有同系列的恐龍圖案，但用全年通行証入場，就無門票相喇！

大家排隊穿越時光隧道，同恐龍齊齊經歷恐龍史上的各個紀元和時間，等入場時先睇睇場刊做功課，大概5分鐘就入到場。

原來一入場會播放恐龍短片再入展館，難怪要在時光隧道等等。影片製作相當精美，超闊螢幕各種恐龍相繼出場，有少量打鬥場面，最後以火山爆發終結。旁邊會有恐龍動畫帶大家進入展覽廳，設計幾有心思。

首個展廳展出一系列恐龍機械人。率先登場的3個恐龍頭，一邊面有皮有肉，另一面得骨頭。前面有恐龍喜愛的食物，機器頭仲會「咀郁郁」扮咬幾得意架！有草食龍、蛇頸龍、當然仲有終極食肉獸T-Rex暴龍啦！

之後登場的係原隻恐龍模型，皮膚紋理同形態都好像真，模型翊翊如生，好吸引！不過Cece好奇怪不論大人細路都伸手入欄杆，不停拍恐龍個頭，難度想將當恐龍寵物？哈哈！ 每隻恐龍都有不同背景，顏色好豐富，在場的小朋友完全陷入瘋狂狀態！我終於明白點解報紙話第一日展出，部份展品就被一眾小魔怪玩殘了，辛苦了恐龍們！ 不過參觀當日並沒有展品暫停展出，係主辨單位極速修理，定係有後備展品就不得而知囉！呵呵！

接住登場的係恐龍機械人，特別做了.gif檔，讓大家感受一下恐龍奔跑跳踴的動感！奔跑的三角龍，好有型吧？

比起奔跑的三角龍，本人更鍾情捉魚的恐龍，神奇之處係...條魚居然會前後游，觀眾完全被魚吸引，估不到展覽館亦會發生抽水事件！今次魚仔成功出位，謀殺我不少「菲林」...記憶卡容量先岩。

現場仲有互動遊戲，觀眾可以扮演馴獸師，用指揮棒令恐龍張牙舞爪！好在係機械龍，換成真恐龍，不咬你幾啖先奇怪！

進入下一展館前，先播放恐龍微電影「大滅絶」！看到這個片名，不知何解腦海不停浮現「大迷信、大迷信、大迷信」3個字，係我童年時被廣告洗腦了嗎？orz...

終於見到了！！如假包換的恐龍化石，這隻巨型禄豐龍是在中國出土的化石，並由中國政府贈送給香港！？所以...香港有恐龍化石了？好利害。

旁邊有紙本文獻，詳細紀錄發掘過程及研究報告。真品用玻璃箱保存，有興趣的話，旁邊還有iPad版的文獻供觀眾參考。不過文獻太深我看不懂，影相留念就心滿意足了！

過場有發掘化石的工具介紹，活像恐龍考古學家的工作室，暗黃的光線下，令人想起「翻生侏羅館」的詭異氣氛。

旁邊仲有發掘中的恐龍化石，形態保存得好好，幻想下自己係考古學家都幾過癮架！　(唔...我想太多了嗎？)

登登登凳！終於到逹第二展廳，一舊超巨大的恐龍化石活現眼前！我嘗試用多角度拍攝，但無論如何都只影到局部照，影到頭影不到身，影到身又影不到頭，影到頭同身又少了尾巴...orz！全身照要行到最偏遠角落才勉強影到，可惜完全影不出雄偉感，當日無帶魚眼鏡實在好難影wide shot, 唯有遠望有近2層樓高的巨型長頸龍化石輕嘆。

同場仲有超級多不同種類恐龍化石，海、陸、空，大、中、細，全系列睇到嘩嘩聲！ 有小巧精緻的小恐龍、萬人迷三角龍頭骨化石、各種恐龍形態應有盡有。

尼斯湖水怪的遠古近親蛇頸龍，化石擺出一副"游"然自得的英姿，好靚仔呀！

當然唔少得最有型的陸上王者暴龍！形態霸氣十足，好有氣勢，總之型仔到爆啦！

展品太多不能盡錄，參觀之旅係2個鐘的hyper心情之中結束了！ (*溫馨提示：請大家留意文末介紹的激光恐龍show，睇完展覽唔好錯過，記住睇埋先走呀！)

出口處設有恐龍精品檔口，務求將大家興奮的心情化為檔主的收入，哈哈！睇見在場的家長同小朋友睇得投入，我亦趁熱鬧睇睇有咩賣，如果當年年紀少，絶對會買一堆恐龍書同模型玩具返屋企！ 不過今次好慳家，無敗家。

想要成副恐龍化石都無問題，大可買隻迷你版過下癒，哈哈！不過屋企無位放，加上無咩心動感覺，所以算了。

出口處原來就在入口隔離，臨走已晚上6點多，入口仍然人山人海，一家大細等候入場，真係幸苦晒各位爸爸媽媽！

館外亦有機械恐龍，晚上射燈照射下別有一番風情！ 唯一缺點係影唔到合照，開閃燈塊面會爆得好勁，唔開閃燈又黑得滯，索性影恐龍算了。

最後要推薦在科學館外牆的激光Show 「古生物的演化」, 全長７分鐘，以激光投射介紹地球生命起源至恐龍滅絶的演化史。用.gif檔節錄部份精華片段同大家分享，Cece覺得製作非常精美，簡單的線條做出各種生物的動態同演化，很有投入感。

參觀當日剛好睇足全場，後來先知激光Show一日只演4場，分別係晚上6:30，7:00，7:30，8:00，只係星期六、日同公眾假期先有咋，想睇的朋友記緊預時間等開場喇！

巨龍傳奇展覽詳程：http://hk.science.museum/ms/lgd/ticketing.html

激光Show 「古生物的演化」詳程：http://hk.science.museum/ms/lgd/special_c1.html

希望大家鍾意Cece的開心分享，今個週末會去參觀嗎？你的支持就係我繼續分享的動力，請大家多多留言或者Share去Facebook都得架！今次Yahoo Blog收檔，千辛萬苦搬去pixnet，總算搬完屋，大家記住Bookmark我個新Blog，或者Like我的Facebook粉絲頁，咁就唔會錯過Cece的分享喇！多謝支持！

"Ceceの華麗麗烘焙。生活記事Blog"粉絲頁：https://www.facebook.com/cecebloghk